الجمعة، 16 أغسطس، 2013

أعقل و تفكر

ليا عليك فيديو ..... و ليك عليا فيديو
رافع عليا سلاح .... رافع عليك سلاح
100 صورة عنك تعبر أنك أرهابى
100 صوره عنى تعبر انى أرهابى
و الحقيقه هى أنك ناسى
أنى فى يوم كنت منك و ليك
و حطيت أيدك فى ايدى
و الميدان فى بلدنا شاهد
أن ده مكنش تمثيل
يبقى ليه القتل ليه؟
شوفت ازاى دمى حلال فى أديك؟!
كفرتنى دلوقتى ليه؟
مهما كان ربى وربك
أنا و أنت مصريين
و الأسلام سلم يا ساعى للشهادة
الأسلام سماح ود و أبتسامه
مش تكفرنى و تحل دمى
نصارى ايه اللى مش عاجبك
ده رسولنا وصى عليه قبلك
يا بن نيلها نفسى تفوق
لو الدم مش واحد
أفتكر نيلنا واحد
كرسى ايه و سلطه ايه؟
أنا وانت اللى باقيين
طب لو حكمت هتحكم ايه؟
تراب و رماد البنى آدمين!
أرفع علم بلدنا أبيض
و نزل علم السواد
مش انا اللى تجاهد ضده
و فر دمى و دمك
ليوم جاى معلوم عند ربك....

الأحد، 4 أغسطس، 2013

يا عمر ماشى


يا عمر ماشى
عمال يسارع عمال يصارع
و ناسى كل أحلامى كل أمالى
محتاجة وقت محتاجة صبر
محتاجه أكون قبل الأوان ما يفوت

الثلاثاء، 2 يوليو، 2013

نقاط هامه يجب ذكرها

1- مرسى لازم يسقط
2- والجيش مش لازم يمسك
- لأن ببساطه مش لازم اللى يمسك البلد يكون بينتمى لطائفه أو لحزب أو لجهة معينه, لكنه لازم ينتمى للشعب طبعا ده لو أحنا عايزين حريه بجد وللى فاهمين حريه يعنى أيه.
- وطبعا فى ناس بتعارضنى و بتقول لازم يمسكها واحد عسكرى اصل البلد دى متمشيش إلا بكورباج أضحك و أقول اتكلم عن نفسك لأنى أكيد مش عايزه لا أنا ولا ولادى نمشى بكورباج.
- و ناس بتعارضنى وبتقولى مش لازم الأخوان تمشى لأن دى حرب على الدين حرب على الأسلام أضحك و أقول لا والله يعنى لو مسكنا اى حد تانى يبقى الأسلام أتهان و الدين ضاع! على أساس الى هيمسكنا ده كافر مش مسلم ولا ليه مله ولا دين! طيب طالما أنت محروق كده على الأسلام متروح تحارب فى فلسطين وتنصر الأسلام يا فتك بدل مانت قاعد تفتى هنا زى الستات ومولعها والسلام.


3- أيها المصريين لا تنخدعوا فى الشرطه الشرطه نازله مش علشان بتحبكوا اوى كده ولا علشان الثورة المصريه , لا أبسلوتلى هم نازلين يأخذوا وضعهم من جديد أتعلموا ان كل اللى وقفوا فى 25 يناير كسبوا وبقوا أبطال و فهموا ان كل اللى هيقف فى 30 / 6 هيبقوا برده أبطال, طبعا مع احترامى للناس السذج اللى هيقلولك لااااا أصلهم فى يناير كانوا مربوطين و خايفين.. أنبى أيه هو اللى بيثور بيعرف خوف ؟ و اللى معاه الحق والنور عمره خاف من الضلمه ياناس قولوا كلام غير ده.

4- ثورتنا علشان تنجح لازم نبقى عارفين مين بالظبط لازم يمسكنا, دور فى دفاتر تاريخنا هتلاقى اننا كنا بنقوم بثوره على حاكم ظالم و أحنا عارفين مين لازم يمسكنا فكنا بنشيل فلان و نحط فلان بداله من غير انتخبات , أصلك أزاى هتعمل انتخبات نزيهة أو تحط دستور سليم فى ظل فساد دام 30 سنه علشان تعمل ده لازم يبقى عندك قائد قوى عادل وسياسى ناجح , أه سياسى ناجح و أه أنا شايفه ان كل السياسين كاذبين ولو صدقوا.. بس مع الأسف السياسى هو الوحيد اللى بيعرف امتى يشد ويقوى على شعبه و أمتى يرخى و يتساهل معاه وفى الغالب بكون ساياسى دائما مع البلاد المحاوطه و أنسان مع بلده و شعبه.


5- الوضع ميطمنش مش هكدب عليكوا لأن أحنا هنطيح من جديد بالرئيس و هنخوض تانى أنتخبات و النتيجه هتكون الدور ده الأخوان ضد العسكر بدل ما كانت الأخوان ضد الفلول, و سعتها هنختار العسكر لأننا مش عايزين الأخوان ( السناريو أياه بيتكرر تانى ) وهنقعد فى الحكم شويه و هنكتشف أن العسكر شادد اوى فى حكمه و ماشينا بالكورباج فهنتمرد تانى و السناريوهات تتعاد تانى, و السؤال اللى محيرنى... أمتى هلاقى الشعب حاكم نفسه من خلال واحد لا ينتمى لطائفه معينه بل ينتمى إلى مصر كلها ؟؟

6- أخيرا يارب احميلى بلدى مهما طلعت عينى علشان هى ننى عينى ♥ .